Жыццё-Маліна – гэта адзін з найбуйнейшых і папулярных youtube шоў сярод беларускай аўдыторыі на 2023 год.
Журналіст Мікіта Мелказёраў робіць інтэрв’ю з прадстаўніцамі і прадстаўнікамі беларускай культуры, палітыкі і спорту,
каб, у тым ліку, знаёміць аўдыторыю са значнымі сучаснікамі.
У асноўным, у паўтарагадзінных выпусках абмяркоўваюцца гарачыя тэмы беларускай сучаснасці, мінулага і погляд на магчымасці будучыні.
Размовы праходзяць часта ў прамой і правакацыйнай манеры хлопца з менскага раёну Масюкоўшчына да інтэлігенцыі,
з інтэнцыяй да глыбокага развіцця тэмы і госця праграмы, а таксама высокіх праглядаў, аб чым кажуць клікбэйтныя загалоўкі кожнага выпуску.
З трэцяга сезону Жыццё-Маліна выходзіць з застаўкай і фірмовым стылем майго аўтарства. У распрацоўке фірмовага стылю я выбірала знаёмы беларусам культурны код – аммаж на маляванкі беларуска-касмічнага мастака Язэпа Драздовіча,
персанажы тэлебачання пачатку 2000 гадоў, згушчонае малако і лідскія кеды.
Па сюжэце Мікіта на фоне сталічных краявідаў прыстае з пытаннямі нават да бусла з зубром,якія з’яўляюцца асноўным і клішыраванным жывёльным вобразам краіны Беларусь.
